លេច
( កិ. ) ចេញពីទីកំបាំង : ស្រាប់តែឃើញលេចប្លឹមពីក្នុងព្រៃមក ។ ជ្រាបហូរចេញ : ទឹកលេចពីភ្លឺស្រែ ។ លៀនចេញឬទុលចេញ : គ្រាប់ឈើដុះលេចពន្លកពីក្នុងដី ។ ធ្លាយឬលាន់ចេញ, ផ្សាយចេញ : លេចសម្ដី, លេចដំណឹង ។ បង្ហាញមុខឬចេញមុខឲ្យឃើញ : ចុះទើបនឹងលេចមុខមកពីណាហ្នឹង ? (ព. ស្ន.) ។ ដើរលេចវាលចូលព្រៃ លេចព្រៃចូលវាល ដើរផុតពីទីវាលចូលក្នុងព្រៃ ចេញពីព្រៃចូលក្នុងវាលទៀត ។ លេចឮ លេចដំណឹងឮដល់ ។ល។ ព. ទ. បុ. លេចទឹកលេចត្រី ការកំបាំងតែហើបចេញ ឮដល់មនុស្សម្នាក់ហើយ ច្រើនតែលេចឮតទៅទៀត (ស្រដៀងគ្នានឹង ក្អែកមួយជាក្អែកដប់ ដែរ) ។
( គុ. ) ដែលមិនគត់ : ក្អមលេច, ផ្ទះលេច, ការុងលេច ។ ព. ប្រ. មាត់លេច មាត់រអិលចេះតែធ្លាយសម្ដីចេញទៅទប់មិនទាន់ : មនុស្សមាត់លេច (និយាយថា មាត់ដាច ក៏បាន) ។
( ន. ) ឈ្មោះដំបៅមួយប្រភេទ កើតនៅបាតជើង ឬកែងជើងលៀនសាច់រឹងចេញមក : កើតដំបៅលេច ។