ក្បិនចំហៀង

(សំលៀក) ប្រភេទសំពត់សម្រាប់ស្លៀកចងក្បិនដោយចាប់ជាយទាំងពីរដាក់ខាងលើផ្ចិតក្របួចចងឱ្យជាប់ រួចមូរផ្នែកចំហៀងខាងឆ្វេងជាកន្ទុយក្បិន វាត់ទៅក្រោយនិងចុកនៅឆ្នុកក្បិន ឯផ្នែកចំហៀងខាងស្ដាំបត់ជាភ្លីចុកពីមខ រួចយកខ្សែក្រវាត់មកពាក់ពីលើ។ បើគេមើលសំពត់ក្បិនចំហៀងពីក្រោយ ឃើញដូចជាទម្រង់សំពត់ក្បិន តែបើគេមើលចំពីមុខ ឃើញដូចជាទម្រង់សំពត់សម្លុយ។ គេឃើញក្បាច់ចម្លាក់លៀននៃរូបបដិមាស្លៀកសំពត់ក្បិនចំហៀងជាច្រើន តាំងនៅសារមន្ទីរជាតិភ្នំពេញ គឺមានតាំងពីសម័យនគរភ្នំ សម័យចេនឡា និង សម័យអង្គរជាដើម។