គុណនាមប្រក្រតី

ពីWiktionary

(វេយ្យាករណ៍) qualificative adjective, adjectif qualificatif គុណនាមប្រក្រតីជាពាក្យមួយប្រភេទ ដែលអាស្រ័យនឹងនាម បញ្ជាក់លក្ខណៈឱ្យនាម ដូចកម្មរបស់នាមដែរ។ កម្មរបស់នាមអាចជានាមឬជាកិរិយាសព្ទ ប៉ុន្តែគុណនាមប្រក្រតីមានលក្ខណៈប្លែកពីកម្មរបស់នាម ដូចមានឧទាហរណ៍ខាងក្រោម : ១- ការបញ្ជាក់លក្ខណៈឱ្យនាម (ដូចកម្មរបស់នាមដែរ), ឧទាហរណ៍ : ១.១- ផ្ទះល្អ (ល្អ គុណនាមដែលមានមុខងារជាគុណបទ (épithète) របស់ ផ្ទះ), ១.២- ផ្ទះថ្ម (ថ្ម នាមដែលមានមុខងារជាកម្មរបស់ ផ្ទះ) ១.៣- ផ្ទះជួល (ជួល កិរិយាសព្ទដែលមានមុខងារជាកម្មរបស់ ផ្ទះ) គេអាចថា : ផ្ទះដ៏ល្អ ប៉ុន្តែ គេមិនអាចថា : * ផ្ទះដ៏ថ្ម ឬ * ផ្ទះដ៏ជួលបានឡើយ។ ២- គេអាចដាក់គុណនាមប្រក្រតី ល្អ ឱ្យទៅជាវិសេសគុណនាម ឬ ជាអតីវេសេស គុណនាម ប៉ុន្តែ កម្មរបស់នាម ដែលជានាមឬជាកិរិយាសព្ទនោះ គេមិនអាចដាក់វាឱ្យទៅជាវិសេសគុណនាម ឬ អតិវិសេសគុណនាម បានទេ, ឧទាហរណ៍: ២.១ - ផ្ទះល្អ អាចដាក់ទៅជាវិសេសគុណនាម : ផ្ទះនេះល្អជាងផ្ទះនោះ ២.២ - ផ្ទះល្អ អាចដាក់ទៅជាអតិវិសេសគុណនាម: ផ្ទះនេះល្អណាស់/ល្អពេក, ... រីឯ ផ្ទះថ្ម, ផ្ទះជួល វិញ គេមិនអាចដាក់វាឱ្យទៅជាវិសេសគុណនាម ឬ អតិវិសេសគុណនាម ទេ, ឧទាហរណ៍: ២.៣- *ផ្ទះនេះថ្មជាងផ្ទះនោះ, * ផ្ទះនេះជួលជាងផ្ទះនោះ,... ២.៤- *ផ្ទះនេះថ្មណាស់, *ផ្ទះនេះជួលណាស់, ... ៣- គុណនាមប្រក្រតី អាចមានទម្រង់បដិសេធ (ដូចកិរិយាសព្ទដែរ ផ្ទុយពីនាមដែលជាកម្មរបស់នាមគ្នាឯង), ឧទាហរណ៍: ៣.១- គុណនាមប្រក្រតី : ផ្ទះល្អ> ផ្ទះមិនល្អ ៣.២- នាមដែលជាកម្មរបស់នាម : ផ្ទះថ្ម> *ផ្ទះមិនថ្ម។