វុត្ត
វុត-តៈ បា.; សំ. ( គុ. ) (ឧក្ត) ដែលបានពោល, បាននិយាយ, បានថ្លែង, បានថា រួចមកហើយ ។ សម្រាប់ប្រើជាបទសមាសរៀងពីខាងដើមនាមនាម, ដូចជា វុត្តការណ៍ ហេតុ, ដំណើរ ដែលបាននិយាយរួចមកហើយ ។ វុត្តដ្ឋាន (វុត-ត័ត-ឋាន) កន្លែងដែលបាននិយាយរួចមកហើយ; កន្លែងដែលបាននិយាយគ្នា ។ វុត្តន័យ ន័យដែលបានពោលរួចហើយ ។ វុត្តនិយម (--យំ) ឬ --និយាម កំណត់, កំណត់ហេតុ ឬ ទំនង ដែលបាននិយាយរួចមកហើយ ។ វុត្តប្បមាណ (វុត-ត័ប-ប៉ៈ ម៉ាន) ប្រមាណ, សន្ទង់, ខ្នាត ដែលបាននិយាយរួចមកហើយ ។ វុត្តភាព ភាព, បែបបទ, ដំណើរ ដែលបាននិយាយរួចមកហើយ ។ វុត្តវាចា ឬ--វាទ សម្តីដែលបាននិយាយរួចមកហើយ ។ វុត្តានុក្រម (--ក្រំ;< បា. វុត្ត + សំ. អនុក្រម “លំដាប់”) លំដាប់នៃពាក្យដែលបាននិយាយរួចហើយ ។ល។