វេវចនសព្ទ

(ភាសាវិទ្យា) synonym, synonyme ពាក្យពីរម៉ាត់ឬវាចាវិសាល (locution) ពីរម៉ាត់ ឬ ក៏ច្រើនម៉ាត់ ជាវេវចនសព្ទនឹងគ្នា កាលណាពាក្យឬវាចាវិសាលនោះមានប្រភេទដូចគ្នានិងអាចជំនួសគ្នាបានក្នុងល្បះដោយឥតបណ្ដាលឱ្យល្បះមានន័យផ្សេង, ឧទាហរណ៍: -គាត់បានលាចាកលោកច្រើនឆ្នាំហើយ។ -គាត់បានទទួលមរណភាពច្រើនឆ្នាំហើយ។ តាមធម្មតា ពាក្យពីរម៉ាត់ដែលជាវេវចនសព្ទនឹងគ្នា មិនមានន័យដូចគ្នាបេះបិទទេ: គេមិនអាចប្រើវាជំនួសគ្នាបានគ្រប់ករណីទេ ឬ វាជំនួសគ្នាបាន ប៉ុន្តែ សណ្ឋានភាសា (registres) មានកម្រិតខុសគ្នា, ឧទាហរណ៍: ករណីដែលគេមិនអាចជំនួសវេវចនសព្ទជាទូទៅបាន: -ភាសាបារាំង: -Le bec aigu = Le bec pointu (aigu = pointu) -Le son aigu គ្មាន * le son pointu ជាវេវចនសព្ទទេ (aigu # pointu) -ភាសាខ្មែរ -ធ្វើការលឿន = ធ្វើការរហ័ស -រត់លឿន # * រត់រហ័ស។ ករណីដែលវេវចនសព្ទមានសណ្ឋានភាសាខុសគ្នា: -ប្ដី (សណ្ឋានភាសាធម្មតា), ស្វាមី (សណ្ឋានភាសាខ្ពស់) -ស៊ី (សណ្ឋានភាសាទាប), ហូប (សណ្ឋានភាសាធម្មតា), ពិសា (សណ្ឋានភាសាខ្ពស់), ...។