ឡុងសុង

ពីWiktionary
Jump to navigation Jump to search

ស. ( ន. ) (រ្ចងទ្រង អ. ថ. រ៉ងសុង “រង​ទ្រង់”) ឈ្មោះ​បែប​ទម្រង់​សក់​មួយ​ប្រភេទ​នៃ​បុរស​កាត់​ចៀរ​ជើង​សក់​មូល សណ្ឋាន​ស្រដៀង​នឹង​ផ្កា​សម្បួរ​ទេស​ឬ​ផ្កា​ក្ទម្ព​ប៉ែក​ខាង​លើ​ទុក​ឲ្យ​មាន​ភាព​វែង​ក្រពុំ : កាត់​សក់​ឡុងសុង ។ ព. កា. ថា : សម័យ​ព្រេង​នាយ ប្រុស​ខ្មែរ​ទាំងឡាយ កាត់​សក់​ឡុងសុង គេ​រាប់​អាន​ថា សម​រូប​សម​ទ្រង់ បែប​នោះ​ពុំ​គង់ នៅ​យូរ​ប៉ុន្មាន ។ មនុស្ស​ប្រុស​និង​ស្រី នៅ​នា​លោកីយ៍ តាក់តែង​ខ្លួន​ប្រាណ តាម​កាល​សម័យ និយម​រាប់​អាន​តាំង​ពី​បូរាណ រៀង​ដល់​ឥឡូវ ។ បណ្ឌិត​ឃើញ​ថា ការ​តែង​កាយា តាម​លោក​តម្រូវ ទោះ​សម​ទោះ​ឆ្គង ទោះ​ត្រូវ​ពុំ​ត្រូវ ពី​ដើម​ឥឡូវ សន្មត​ថា​ល្អ ។ ลงทรง

ស. ( ន. ) (លងស្រង អ. ថ. ល៉ុងសុ៎ង “ចុះ​ស្រង់”, សៀម​មួយ​ម៉ាត់ ខ្មែរ​មួយ​ម៉ាត់ ផ្សំ​គ្នា) ឈ្មោះ​បទ​ភ្លេង​ពិណពាទ្យ​មួយ​មេ សម្រាប់​លេង​ថ្វាយ​ក្នុង​វេលា​ដែល​ព្រះ​រាជា​ទ្រង់​ស្នាន (ទ្រង់​ស្រង់) : លេង​ភ្លេង​ឡុងសុង​ (លេង​ភ្លេង​ស្តេច​ស្រង់); ឬ​លេង​ក្នុង​វេលា​និមន្ត​ភិក្ខុ​សង្ឃ​ស្រង់​ទឹក​ក្នុង​ថ្ងៃ​សង្រ្កាន្ត​ជាដើម​ក៏​ប្រើ​ខ្លះ​ដែរ ។ ព. កា. ថា: មហា​ក្សត្រិយ៍​ឬ​សង្ឃ នៅ​ពេល​ត្រូវ​ស្រង់- ទឹក​ដោយ​កម្សាន្ត ក្នុង​កាល​ចូល​ឆ្នាំ ជា​ថ្ងៃ​សង្រ្កាន្ត ហៅ​ថា​ពេល​ស្នាន មាន​ភ្លេង​ឡុងសុង ។ សម័យ​សព្វ​ថ្ងៃ បើ​ចង់​កែខៃ គួរ​ហៅ​ភ្លេង​ស្រង់ ចម្រើន​សិរី មង្គល​អស់​អង្គ ទោះ​ក្សត្រិយ៍​ទោះ​សង្ឃ ប្រសិទ្ធ​សួស្ដី ។