អាមក
--ម៉ៈកៈ សំ. បា. ( គុ. ) (ឬជា អាម ក៏មាន) ឆៅ; ស្រស់ ។ អាមកនិវាប, --និវាប : (--វាប ឬ --វាប៉ៈ) ឬ អាមកសាក, --សាកៈ បន្លែឬអន្លក់ស្រស់, ឆៅ (ម. ព. សាកៈ ផង) ។ អាមកបាត្រ បាត្រឆៅ (បាត្រដីដែលមិនទាន់បានដុត) ។ អាមកភត្ត បាយឆៅ ។ អាមកភោជន ភោជនឆៅ ។ អាមកភោជី អ្នកដែលចូលចិត្តបរិភោគអន្លក់ឆៅ; សត្វតិរច្ឆាន (មនុស្សស្រីឬសត្វតិរច្ឆានញីជា អាមកភោជិនី) ។ អាមកសុសាន ឬ--ស្មសាន ស្មសានសម្រាប់ចោលអសុភស្រស់, ស្មសានដែលតម្កល់ឬកប់ខ្មោចស្រស់ ។ អាមកសូប សម្លឆៅ ។ល។