មហារីក
( ន. ) ឈ្មោះរោគមួយប្រភេទ កើតត្រង់មាត់បបូរមាត់រីកស្ទាញដូចផ្សិតក៏មាន កើតត្រង់សរីរាវយវៈខាងក្នុងផ្សេងពីមាត់ក៏មាន, ជារោគរបឹងរឹងត្អឹងក្រៃពេក ពេទ្យពិបាកនឹងព្យាបាលឲ្យសះជាបាន : កើតមហារីក (បារ. cancer ខ្មែរក៏ហៅ រោគកង្សែរ តាមបារាំងខ្លះដែរ), ជំងឺកើតឡើងជាដុំពក ជាដំបៅមិនប្រក្រតី នៅតាមសរីរាង្គណាមួយរបស់មនុស្សឬសត្វបង្កឡើងដោយកោសិកាដែលដុះរីកលូតលាស់ខុសធម្មតា និង រាលដាល បង្កជាជំងឺស្រួចស្រាល់ឬរ៉ាំរ៉ៃបណ្ដាលឱ្យស្លាប់ បើមិនមានការព្យាបាលឱ្យបានត្រឹមត្រូវតាមក្បួនខ្នាត ជំនាញឱ្យទាន់ពេលវេលាទេនោះ។ ឧ. អ្នកជំងឺនេះស្លាប់ដោយជំងឺមហារីកថ្លើម។
( ន. ) ផ្លេកបន្ទោរដែលបញ្ចេញពន្លឺព្រិចៗព្រើតៗរឿយៗក្នុងវេលាមានភ្លៀងច្រើន ឃើញច្បាស់តែនៅពេលយប់ (ហៅ ស្វាញាក់ចិញ្ចើម ក៏បាន) ។
- មហារីកជាយក្សដែលក្រុងរាពណ៍ហៅអោយមកជួយតាមចាប់នាងសីតា។ ក្រុងរាពណ៍អោយមហារីកប្រែកាឡាជាសត្វប្រើសដែលមានសម្បុរដូចមាស មានរូបឆោមល្អស្អាតដើរក្បែរអាស្រមនាងសីតា។ នាងសីតាឃើញប្រើសមាសក៏មានចិត្តចង់យកស្បែកមកធ្វើជាកម្រាល ហើយសុំអោយព្រះរាមតាមបាញ់។ ពេលដែលព្រះរាមចេញទៅ ក្រុងរាពណ៍បានប្រែកាឡាធ្វើជាឥសីចូលមកជិតនាងសីតា រួចចាប់យកនាងហោះចេញទៅ។ រូបនេះបង្ហាញពីមហារីកប្រែកាឡាជាប្រើសមានសម្បុរដូចមាសកំពុងដើរបង្អួតខ្លួន។