អាវ

ដោយWiktionary

( ន. ) សំពត់​ដែល​គេ​វាស់​កាត់​តាម​ខ្នាត​រួច​ដេរ​ស្រេច​ហើយ, មាន​តួ, មាន​-ក, មាន​ដៃ, មាន​ឡេវ សម្រាប់​ប្រើ​ជា​គ្រឿង​ពាក់​ស្រោប​ខ្លួន​ពី​ត្រឹម​ក​ចុះ​មក, មាន​បែប​និង​ឈ្មោះ​ផ្សេង​ៗ ហៅ​ដោយ​សង្ខេប​មាន​ត្រឹម​តែ​ពីរ​យ៉ាង​គឺ អាវ​ប្រុស, អាវ​ស្រី ។ ប្រវែង​សាច់​សំពត់​ដែល​ល្មម​កាត់​ដេរ​ជា​អាវ​មួយ​បាន តាម​ខ្នាត​អាវ​វែង​ឬ​ខ្លី ក៏​ហៅ អាវ ដែរ : សំពត់​មួយ​អាវ (វែង), សំពត់​មួយ​អាវ (ខ្លី) ។ គួរ​កុំ​និយាយ​ថា លុយ​តិច​ពេក ទិញ​កំណាត់​មួយ​អាវ​មិន​បាន; គួរ​និយាយ​ថា ប្រាក់​តិច​ពេក ទិញ​សំពត់​មួយ​អាវ​មិន​បាន (គឺ​កុំ​ប្រើ​ពាក្យ លុយ និង​ពាក្យ​ កំណាត់ ព្រោះ​ជា​ពាក្យ ទាប នាំ​ឲ្យ​ទ័ល​ក្រ​ឬ​ខ្វះ​ខាត​តាម​មាត់​ថា...) ។ ម. ព. សំពត់ ទៀត​ផង ។

( ន. ) ឈូង​សមុទ្រ (ចំពោះ​តែ​ប៉ែក​សមុទ្រ​ដែល​លូក​ចូល​មក​រក​ផែនដី ត្រង់​ទី​ប្រទល់​ចុង​បំផុត​ទន្លេ គឺ​ត្រង់​ទី​ដែល​ទន្លេ​ហូរ​ចុះ​ទៅ​ចួប​នឹង​សមុទ្រ, ហៅ​ថា អាវ​សមុទ្រ) ។

( គុ. ) ដែល​មាន​សាច់​រឹង​ខុស​ពី​ប្រក្រតី​ដើម (ព្រោះ​ជីក​ឬ​គាស់​យក​មក​ទុក​យូរ​ហួស​កំណត់) ទុក​ជា​ស្ងោរ​ច្រើន​អំពុះ​ឬ​ប៉ុន្មាន​ទឹក​ក៏​មិន​រលួយ គ្រាន់​តែ​ឆ្អិន​ប៉ុន្តែ​ច្រុប​ៗ (ចំពោះ​តែ​មើម​បែប​ខ្លះ) : មើម​ដំឡូង​អាវ (ពាក្យ​សាមញ្ញ​នៃ​អ្នក​ស្រុក​ខ្លះ​ថា ដំឡូវ​ខ្លា​ខាំ) ។ ព. ប្រ. ដែល​បាន​សិក្សា​វិជ្ជា​ណា​មួយ​យូរ​ឆ្នាំ ប៉ុន្តែ​រៀន​ព្រួល​ៗ ចេះ​ពុំ​ប្រាកដ យក​ជា​ការ​ប្រាកដ​ប្រជា​ពុំ​កើត : មនុស្ស​អាវ ឬ មនុស្ស​ដំឡូង​អាវ (ព. ព.); ចំណេះ​អាវ ឬ វិជ្ជា​អាវ (ព. សា.) ។