វេសម្មវិធី

(អក្សរសិល្ប៍) opposition and contrast, opposition et contraste វិធីតែងនិពន្ធមួយបែប ដែលកវី អ្នកនិពន្ធ ចេះលើកយកគុណភាពពីរ ចលនា ឬ សកម្មភាពពីរ សំនួនសេចក្ដីពីរ មតិទស្សនៈពីរ ឬ អត្តៈខាងក្នុងនិងខាងក្រៅ របស់តួអង្គណាមួយ ដែលមានភាពផ្ទុយគ្នាមកដាក់ប្រៀបគ្នា ដើម្បីជាមធ្យោបាយពន្លេចឱ្យឃើញនូវតម្លៃអ្វីមួយ។ ឧ.: នៅក្នុងរឿងរាមកេរ្តិ៍ ការរៀបរាប់អំពីកូខ័ន បង្ហាញពីទំនាស់ខាងក្នុងនិងខាងក្រៅ - [...] សក្ដិសួនជាអ្នកថ្មើរព្រៃ ខ្លួនខ្មៅក្រៅវិស័យ នូវធ្មេញសស្នឹមភ្នែកច្រាល។ ខ្លួនខ្លោះខ្លាំងខែងពេញពាល ធាត់ធំមមារ មមួរមមុលព្រឹក្សព្រៃ ^១០។ [...] ឧ.: នៅក្នុងរឿងទុំទាវ ការបង្ហាញទស្សនៈពីរផ្ទុយគ្នា រវាងម្ដាយនិងកូន -[...] អំណាចខ្លបខ្លាចមានស័ក្ដិយស ចំពោះជាត្រូវបុណ្យកូនឡើង ម្ដាយប្រាប់ប្រដៅកូនកុំឆ្មើង ចចេសចចើងណាថ្លៃម្ដាយ។ ទាវឮម្ដាយប្រាប់ចាប់ចាំទុក ស្ទើរធ្លាក់ថ្លើមក្ដុកពុំរសាយ ទើបមានវាចាថាម៉ែអាយ ខ្ញុំកូនដូចស្ដាយបាយចំណី។ ថាបើម៉ែព្រមល្មមនឹងគេ កូនម៉ែទំនេរមានប្រុសស្រី លើកឱ្យគេទៅទោះពីរបី តាមម៉ែមេត្រីឱ្យថ្វីខ្ញុំ^១១។ [...]