ការបំបែកនាម
(វេយ្យាករណ៍) declension, déclinaison ដំណើរបំបែកនាមដោយប្រើភាគខាងចុងផ្សេងៗគ្នាទៅតាមមុខងារនៃនាមក្នុងល្បះ។ នៅក្នុងវេយ្យាករណ៍បាលី វិភត្តិនាមមាន ៨ គឺ:
ឯកវចនៈ | ពហុវចនៈ | |
---|---|---|
បឋមាវិភត្តិ | បុរិសោ | បុរិសា |
ទុតិយាវិភត្តិ | បុរិសំ | បុរិសេ |
តតិយាវិភត្តិ | បុរិសេន | បុរិសេហិ, បុរិសេភិ |
ចតុត្ថីវិភត្តិ | បុរិសស្ស, បុរិសាយ, បុរិសត្ថំ | បុរិសានំ |
បញ្ចមីវិភត្តិ | បុរិសស្មា, បុរិសម្ហា, បុរិសា | បុរិសេហិ, បុរិសេភិ |
ឆដ្ឋីវិភត្តិ | បុរិសស្ស | បុរិសានំ |
សត្តមីវិភត្តិ | បុរិសស្មឹ, បុរិសម្ហិ, បុរិសេ | បុរិសេសុ |
អាលបនៈ | បុរិស | បុរិសា |
កំណត់សម្គាល់: - វិភត្តិសព្វនាម និង វិភត្តិគុណនាម មានលំនាំដូចគ្នានឹងវិភត្តិនាមដែរ។ -ក្នុងតារាងខាងលើ គេបង្ហាញវិភត្តិរបស់ពាក្យមួយដែលមានការប្រែប្រួលខាងចុងទៅតាមមុខងាររបស់វាក្នុងល្បះ។ -ខាងក្រោម ជាឧទាហរណ៍ជាក់ស្ដែងនៃការប្រើប្រាស់វិភត្តិទៅតាមមុខងាររបស់ពាក្យក្នុងល្បះ ប៉ុន្តែ គេបានប្រើពាក្យផ្សេងៗគ្នាឱ្យស្របតាមបរិបទ។ ១-បឋមាវិភត្តិ (ត្រូវនឹងវិភត្តិឡាតាំង ហៅតាមបារាំងថា : nominatif) សម្រាប់មុខងារជាប្រធាន, ឧទាហរណ៍: កសិករោ ខេត្តំ កសតិ (កសិករភ្ជួរស្រែ)។ ២-ទុតិយាវិភត្តិ (ត្រូវនឹងវិភត្តិឡាតាំង ហៅតាមបារាំងថា: accusatif) សម្រាប់មុខងារជាកម្មបទផ្ទាល់ (complément d'object direct), ឧទាហរណ៍: សិស្សោ អក្ខរំ ឧគ្គណ្ហាតិ (សិស្សរៀនអក្សរ)។ ៣-តតិយាវិភត្តិ (ablatif d'agent et ablatif d'instrument) សម្រាប់មុខងារជា:
- កម្មភ្នាក់ងារ, ឧ. អយំ គេហោ មម មាតុលេន និម្មិយតេ (ផ្ទះនេះសង់ដោយពូខ្ញុំ)។
- កម្មមធ្យោបាយ, ឧ. កសិករោ នង្គលេន ខេត្តំ កសតិ (កសិករភ្ជួរស្រែនឹងនង្គ័ល)
៤-ចតុត្ថីវិភត្តិ (ត្រូវនឹងវិភត្តិឡាតាំងហៅតាមបារាំងថា: datif) សម្រាប់មុខងារ ជាកម្មសម្បទាន ប្រាប់សេចក្ដីទទួល (complément d'attribution), ឧ. ពុទ្ធោ លោកេ មនុស្សានំ ធម្មំ ទេសេតិ (ព្រះពុទ្ធសម្ដែងធម៌ដល់មនុស្សក្នុងលោក)។ ៥-បញ្ចមីវិភត្តិ សម្រាប់មុខងារជាកម្មអបាទាន ប្រាប់សេចក្ដីឃ្លាតចាក (ablatif de séparation), ឧ: មយំ វាណិជស្មា មញ្ចំ កីណាម (យើងទិញគ្រែពីឈ្មួញ)។ ៦-ឆដ្ឋីវិភត្តិ (ត្រូវនឹងវិភត្តិឡាតាំង ហៅតាមបារាំងថា: génitif) សម្រាប់មុខងារជាកម្មរបស់នាម , ឧទាហរណ៍: លោកេ មនុស្សា សុរិយស្ស រំសឹ បស្សន្តិ (មនុស្សទាំងឡាយ ក្នុងលោកឃើញពន្លឺព្រះអាទិត្យ)។ ៧-សត្តមីវិភត្តិ (locatif) សម្រាប់មុខងារជាកម្មទេសកាលសម្គាល់ទីកន្លែង, ឧទាហរណ៍: មច្ឆា ជលេ វសន្តិ (ត្រីទាំងឡាយរស់នៅក្នុងទឹក)។ ៨-អាលបនៈ (ត្រូវនឹងវិភត្តិឡាតាំង ហៅតាមបារាំងថា: vocatif) សម្រាប់ហៅ, ឧទាហរណ៍: បុត្ត សាលំ គច្ឆាហិ (ម្នាលកូនចូរឯងទៅសាលា)។ វិភត្តិនាមឡាតាំងមាន ៦បែបគឺ: ១-Nominatif : មានមុខងារជាប្រធាន, ២-Accusatif: មានមុខងារជាកម្មបទផ្ទាល់, ៣- Génitif.... : មានមុខងារជាកម្មសម្រាប់នាមដូចគ្នា, ៤- Datif..........: មានមុខងារជាកម្មសម្បទាន (complément d'attribution), ឧទាហរណ៍: donner quelque chose à quelqu'un, (à quelqu'un ជាកម្មសម្បទាន), ៥-Ablatif ..... : មានមុខងារជាកម្មទេសកាលសម្គាល់បែប, ប្រភព, មធ្យោបាយ,ទីកន្លែង, ៦-Vocatif.... : សម្រាប់ហៅ។