បូរណសព្ទ

(ភាសាវិទ្យា) lexis, lexie មូលតា (វចនតា និង រូបតា) ជាកំណាត់ក្នុងខ្សែសម្ដីដែលងាយសម្គាល់តាមរយៈន័យអប្បបរមារបស់វា ប៉ុន្តែ អ្នកប្រើប្រាស់ភាសាឥតមានលទ្ធភាពផ្គុំវាដោយសេរីជាទូទៅទេ។ តំណរវាងមូលតាខ្លះ ត្រូវភាសាបង្ខំឱ្យអ្នកប្រើប្រាស់ទទួលយកតែម្ដង។ តំណដែលភាសាបង្ខំឱ្យអ្នកប្រើប្រាស់ទទួលយកនេះ ត្រូវបាន បែរណា ប៉ូជេ (Bernard Pottier) ហៅថា lexie ដែលយើងប្រែថា បូរណសព្ទ។ តាមគាត់បូរណសព្ទជាកំណាត់ទោល ដូច cheval ឬ ជាកំណាត់ល្បាយដូច cheval-vapeur ឬ cheval marin ដែលមានឯកភាពមិនអាចកាត់តបែបណាទៀតបានទេ ហើយដែលយើងត្រូវប្រើទាំងស្រុង។ បូរណសព្ទ មានពាក្យទោល (mots irréductible) ពាក្យកម្លាយ (mots dérivés) ពាក្យសមាស (mots composés) វាចាវិសាល (locutions) ពាក្យកាត់ (sigle)។ល។ យើងតែងតែពិបាកសម្គាល់បន្លែករវាង បូរណសព្ទ និងកន្សោមសេរី កើតពីគារផ្គុំពាក្យតាមសេចក្ដីត្រូវការដើម្បីបញ្ចេញមតិ។ ដើម្បីដោះស្រាយបញ្ហានេះ ភាសាវិទូមួយក្រុម បានបង្កើតតេស្ត (test) បួនបែបផ្អែកលើលក្ខណវិនិច្ឆ័យរូបនិយម (critères formels) ដែលអាចឱ្យគេសម្គាល់បន្លែករវាង បូរណសព្ទ និង កន្សោមសេរី នេះបាន។