រាក់
( គុ. ) ទីទៃពីជ្រៅ គឺមានជម្រៅតិច : ទឹករាក់, រណ្ដៅរាក់ ។ គំនិតរាក់ គំនិតសើៗ មុជមិនជ្រៅទៅមិនឆ្ងាយ ។ ចិត្តរាក់ ចិត្តសើៗ ឆាប់ដោយតាមគេ (ម. ព. ឧត្តានៈ ផង) ។ សេចក្ដីរាក់ សេចក្ដីងាយ មិនពិបាកយល់ ។ល។
( ន. ) ឈ្មោះឈើតូច ស្លឹកក្រាស់សម្បុរ-សប្រផេះ ដែលយ៉ាងធំប៉ុនៗបាតដៃ មានជ័រស, មាន ២ ប្រភេទគឺ រាក់ស ផ្កាសម្បុរ-ស, រាក់ក្រហម ផ្កាសម្បុរស្វាយស្រគាំ; ផ្ការាក់ទាំង ២ យ៉ាងនេះមានក្លិនក្រអូបសាយក្រពុលបន្តិចៗ ជនានុជនរាប់អាន ច្រើនដោតក្រងជាផួងមាលា ឬប្រើក្នុងវេលាថ្វាយបង្គំទទួលឋានន្តរ (ថ្វាយបង្គំងារ)។ Calotropis gigantea (L.) Dryand
( ន. ) ឈ្មោះរោគកើតនៅជើងធ្មេញបណ្ដាលឲ្យហើមសាច់ជើងធ្មេញ កកើតជាខ្ទុះឈាមស្អុយនាំឲ្យធ្មេញឆាប់រង្គើរង្គោះ : ធ្មេញកើតរាក់ ឬ កើតរាក់ធ្មេញ ។ រាក់ធ្មេញ
( ន. ) ឈ្មោះរោគឧច្ចារមគ្គបណ្ដាលឲ្យធ្ងន់បាត (ធ្ងន់ទ្វារធំ) ឈឺស្ទំក្នុងពោះ លីងកន្លាស់អស់កម្លាំងល្ហិតល្ហៃ, មាន ២ យ៉ាងគឺ រាក់ស ធ្លាក់សុទ្ធតែខ្ទុះរំអិលគ្មានឈាម, រាក់ក្រហម ធ្លាក់រំអិលមានឈាម : កើតរាក់ ឬ កើតរាក់បាត ។ រាក់បាត