សំពោចកលឿង
ភិនភាគ៖ សំពោចកលឿងមានរូបរាងប្រហាក់ប្រហែលនឹងសត្វសំពោធដែរ ប៉ុន្តែស្តើងទ្រវែងបន្តិច។ នៅក្នុងប្រទេសកម្ពុជា វាមានប្រែប្រួលទៅតាមតំបន់ផ្សេងៗ ដែលវារស់នៅដូចជានៅភូមិភាគនិរតី ពួកវាដងខ្លួនស្ទើរទាំងមូលមានពណ៌លឿង រីឯនៅភូមិភាគខាងកើតវាមានពណ៌លឿង តែនៅត្រង់បំពង់ក និងពោះប៉ុណ្ណោះ ចំណែកឯខ្នងមានពណ៌ត្នោត។ ជាទូទៅពួកវាមានកពណ៌លឿងជានិច្ច ទោះបីជាពួកវារស់នៅទីកន្លែងណាក៏ដោយ។ ជីវសាស្ត្រ៖ សំពោចកលឿងនេះជាសត្វដែលអាចរស់នៅក្នុងទីជំរកគ្រប់ប្រភេទ ប៉ុន្តែវាចូលចិត្តរស់នៅក្នុងទីជម្រកដែលមានព្រៃជាង ហើយអាចឡើងដើមឈើបានយ៉ាងលឿន។ ជាញឹកញាប់វាចុះមកក្រោមដើម្បីរកចំណី។ សត្វនេះច្រើនរកស៊ីនៅពេលថ្ងៃជាគូៗ ឬក្រុម ជួនកាលក៏មានចេញរកចំណីនៅពេលយប់ផងដែរ។ ចំណីរបស់វាមានដូចជា កំប្រុក សត្វស្លាប ស៊ុត ពស់ បង្គួយ កង្កែប សត្វល្អិត ផ្លែឈើ ឬទឹកឃ្មុំផងដែរ។ សត្វនេះមានអាយុកាល ១៤ឆ្នាំ និងមានកូនជាមធ្យម ៣-៤ក្បាល។
រប៉ាយរស់នៅ៖ ប្រភេទនេះមាននៅទូទាំងប្រទេសកម្ពុជាក្នុងទីជំរកសមស្របប្រភេទព្រៃស្រោង និងពាក់កណ្តាលស្រោង។ ពួកវាក៏មានវត្តមានផងដែរ នៅទូទាំងភូមិភាគអាស៊ីអាគ្នេយ៍ ភាគខាងជើងអាស៊ីបេរី និងភាគខាងលិចប្រទេសប៉ាគីស្ថាន។
ស្ថានភាពអភិរក្ស៖ សំពោចកលឿង កំពុងរងគ្រោះដោយសារ ការបរបាញ់ ទាក់ចាប់ និងបាត់បង់ទីជម្រក។ សំពោចកលឿងស្ថិតក្នុងក្រុមប្រភេទមានដោយបង្គួរ។ ត្រូវបានចុះបញ្ជីនៃបញ្ជីក្រហម IUCN (LC) ថាជាប្រភេទរងគ្រោះថ្នាក់តិចតួច។