ស្នង
( ន. ) តំណាង ។ ឋានន្តរក្រមការខែត្រក្នុងរជ្ជកាលពីដើម ។ កិ. ជួល, ចេញខ្លួនជាតំណាង : កូនស្នងឪពុក ។ គុ. ដែលជាតំណាង, ជាជំនួស : ព្រះពុទ្ធរូបស្នងព្រះអង្គ ។ ស្នងការ មន្រ្តីទទួលភារៈត្រួតត្រារបៀបរៀបរយនិងសន្តិសុខក្នុងទីក្រុង : ទទួលបង្គាប់ពីលោកស្នងការ; សមាជិកនៃគណៈកម្មការដែលទទួលមុខងារជាអ្នកចាត់ការផ្សេងៗជាតំណាងសមាគមណាមួយ : គួរចាត់ស្នងការពីររូបឲ្យទៅប្រស្រ័យទាក់ទងពីរឿងនោះ (បារ. Commissaire) ។ ស្នងការដ្ឋាន ទីតាំងឬទីចាត់ការរបស់ស្នងការ ។ ព. ទ. បុ. ទំពាំងស្នងឬស្សី (ម. ព. ទំពាំង) ។ ស្នងព្រះនេត្រ (រ. ស.) ស្នងភ្នែក (វ៉ែនតា) ។ ស្នងព្រះហស្ដ (រ. ស.) វែករាប់បាត្រ ។ ស្នងព្រះអង្គុលី (រ. ស.) ស្លាបព្រា, សម ។ ស្នងភ្នែក វ៉ែនតា (សម្រាប់សាធារណជន) ។ តបស្នង សងតបវិញ, តបឧបការគុណ : ធ្វើបុណ្យតបស្នងសងគុណមាតាបិតា ។ល។