អន្ធ
អន់-ធៈ សំ. បា. ( គុ. ) ខ្វាក់ (ទាំងពីរខាង); ព. កា., បើបុរសប្រើជា អន្ធោ; ស្ត្រីជា អន្ធា ក៏បាន; ព. កា. ថា : អន្ធោអន្ធា នៅជាមួយគ្នា សុទ្ធតែពពើម រាវរកនេះនោះ ទទីមទទើម ពពីមពពើម ជួនរកមិនឃើញ ។ អន្ធការ ងងឹត ។ អន្ធការដ្ឋាន ឬ --ស្ថាន ទីងងឹត ។ អន្ធការពន្ធនាគារ ឬ --គ្រឹះ (--ការ៉ៈ--) គុកងងឹត ។ អន្ធកូប អណ្ដូងងងឹតគឺអណ្ដូងដែលមានមាត់តូចក្រហួចងងឹតឈ្ងោកមើលទឹកពុំឃើញ ។ អន្ធពាល ល្ងង់ងងឹតសូន្យឈឹង (ដូចមនុស្សខ្វាក់) : ជនអន្ធពាល (ម. ព. អនុពាល ផង) ។ អន្ធូបមា ឬ អន្ធោបមា (--ប៉ៈ ម៉ា; < អន្ធ + ឧបមា) ឧបមាឬប្រៀបដូចមនុស្សខ្វាក់ ។ល។