អស្តា
ជើង ដ, អ. ថ. អ័ស-ស្តា សំ.; បា. ( ប. សំ. ) (អឞ្ត; អដ្ឋ) ប្រាំបី (៨) ។ លេខអស្តា ឬ អស្តាលេខ លេខ៨។ ឈ្មោះវណ្ណយុត្តមួយយ៉ាងមានសណ្ឋានជាលេខប្រាំបី (៨) សម្រាប់ដាក់លើអក្សរទោលនាំអក្សរនោះឲ្យមានសំឡេងកញ្ឆក់ខ្លីរហ័ស, ដូចជា ក៏បាន, ក៏ដែរ, ក៏ដោយ, ដ៏បវរ, ដ៏ប្រសើរ, ដ៏ហើយដោយមាស, ព្ធដ៏អាកាស; ហ៏ !, ហ៏យកចុះ !, ន៏ !, នុ៎ះន៏ !; អុញន៏ ! ជាដើម (ម. ព. លេខអស្តា ទៀតផង) ។ អស្តាង្គ (អ័សស្តាង, បើរៀងភ្ជាប់ពីខាងដើមសព្ទដទៃ អ. ថ. អ័ស-ស្តាង-គៈ) អង្គ ៨ : អស្តាង្គសីល ឬ អស្តាង្គិកសីល សីលមានអង្គ ៨ គឺសីលមាន ៨ សិក្ខាបទ (សីល ៨) ។ វេវ. អដ្ឋង្គសីល ឬ អដ្ឋង្គិកសីល។ អស្តាពីស ម្ភៃប្រាំបី (២៨) ។ អស្តារ្យសង្ឃ (អ័ស-ស្តារ-យ៉ៈសង់) អរិយសង្ឃឬអារ្យសង្ឃ ៨ ពួក (ព. ពុ.) ។ល។