អាណាប្លាស្មូស

anaplasmosis/ anaplasmiasis, anaplasmose ជំងឺបង្កដោយបរាសិតស្ថិតក្នុងសន្តាន អឺលីស្យាសេអា (ehrlichiaceae) ពួកអាណាប្លាស្មា (anaplasma) កើតចំពោះ គោ ក្របី ចៀម ពពែ ឆ្កែ សេះបង្កង់ ក្ដាន់ឈ្លូស ប្រើស អូដ្ឋ ប៉ុន្តែ គោជាសត្វដែលរងការរាតត្បាតខ្លាំងជាងគេ ជាពិសេស គោពេញវ័យ។ ចំពោះ គោ ជំងឺនេះបង្កដោយបរាសិតមានពីរប្រភេទគឺ ប្រភេទអា. ម៉ារហ្ស៊ីណាល់ (A. marginale) និង អា. សង់ត្រាល់ (A. centrale)។ ចំពោះចៀម បង្កដោយបរាសិតប្រភេទ អា. អូវីស (A. ovis)។ បរាសិតរស់ក្នុងគោលិកាក្រហមរបស់គោនិងចងម្លងទៅដង្កែតាមរយៈការខាំបឺតឈាម។ នៅក្នុងសារពាង្គកាយ ដង្កែបរាសិតបន្តពូជរីកលូតលាស់ជាច្រើនដំណាក់កាល ហើយចម្លងទៅសត្វដទៃទៀត ដោយសារការខាំបឺតឈាមសត្វនោះ។ ក្រៅពីដង្កែរុយបឺតឈាម របោមនិងមូស ក៏ជាភ្នាក់ងារចម្លងជំងឺនេះដែរ។ រោគសញ្ញាមានដូចជា ឡើងកម្ដៅខ្លួនពី៤០ ទៅ៤១ ^oC ភ្នាសសើមស្លេកឬជួនកាលពណ៌លឿងគោលិកាក្រហមពណ៌ប្រឿងៗ ឈាមរាវ ចំនួនគោលិកាក្រហមចុះថយខ្លាំងមិនឃ្លានចំណីឬមិនស៊ីចំណីតែម្ដង រាករូស ចុះស្គមលឿន រាងកាយទ្រុឌទ្រោមខ្លាំង និង កង្វះគោលិកាក្រហមបណ្ដាលឱ្យសត្វកើតជំងឺខាន់លឿង។