ឧម្មង្គ
អ៊ុម-ម៉ង់ ឬតាមទម្លាប់ថា អ៊ុម-ម៉ុង បា.; សំ. ( ន. ) (ឧន្មាង្គ ?) រូងដែលជីកលុងក្នុងដីឬក្នុងភ្នំជាផ្លូវដើរបាន : ជីកឧម្មង្គ, ដើរក្នុងឧម្មង្គ, ឧម្មង្គផ្លូវអយស្ម័យយាន (ព. សា. ច្រើនហៅ អុងមុង្គ) ។ ព. កា. បញ្ជាក់ឲ្យអានថា អ៊ុមម៉ង់ (បទពំនោល) : រីផ្លូវអយស្ម័យយាន ខ្លះតែងតែមាន ឧម្មង្គក្នុងភ្នំដែលទើស ។ ព្រោះចៀសមិនផុតត្រូវជ្រើស យល់ថាអាចរើស យកត្រង់តួភ្នំនេះចុះ ។ គេគាស់រំលើងថ្មនុះ គេចោះទម្លុះ ឲ្យកើតជាផ្លូវឧម្មង្គ ។ អយស្ម័យយានបើកត្រង់ ចូលតាមឧម្មង្គ ចេញផុតពីភ្នំទៅស្រួល ។ ឧម្មង្គចោរ (អ៊ុម-ម៉ង់គៈ--) ចោរដែលជីកដីជារូងក្រោមជើងជញ្ជាំងផ្ទះរាប ទម្លុះចូលលួចយកទ្រព្យរបស់ក្នុងផ្ទះ ។