ស្រូវ

ស្រូវ - Oryza sativa ជា ធុញ្ញជាតិ ដែលត្រូវបានដាំដុះនៅតំបន់ក្ដៅនិងសើម ដើម្បីយកគ្រាប់ ជាធម្មតា គឺ អង្ករ ដែលសម្បូរដោយជាតិអាមីដុង ដែលជាប្រភពថាមពលសំខាន់ជាងគេ នៅក្នុងចំណីអាហារប្រចាំថ្ងៃ។ គ្រាប់សូវ ដែលកិនយកសំបកចេញ បានជា អង្ករសំរូប ដែលមានពណ៌ក្រហមជាំ ដោយសារស្រោមនៃស្រទាប់អេពីឌែម (épiderme) ដែលនៅក្នុងនោះមានស្រទាប់សំខាន់មួយ ហៅថា ស្រទាប់អាលឺរ៉ូន (aleurone) ដែលសម្បូរួទៅដោយ ប្រូតេអ៊ីន វីតាមីនB ខ្លាញ់ និងជាតិសរសៃ (fibre)។ តាមធម្មតាក្នុងការបរិភោគ គេយកអង្ករសំរូបទៅកែច្នៃបន្តទៀត ដើម្បីបានជា អង្ករសម្រិត ដែលមានពណ៌ ស ដោយជម្រះស្រទាប់អេពីឌែមចេញ។ ដូច្នេះអង្ករសម្រិតត្រូវបានបាត់បង់ស្ទើរអស់ស្រទាប់អាលឺរ៉ូន។ បញ្ហាជាតិអារសឺនិក (arsenic) ជាពិសេស នៅពេលដែលធ្វើប្រពលវប្បកម្មកសិកម្ម ដោយប្រើថ្នាំពុល និងជីរគីមី តែងសាយភាយទៅក្នុងទឹកធម្មជាតិ នូវ ជាតិអារសឺនិកអសរីរាង្គ (arsenic inorganique) ដែលជាជាតិពុលគ្មានពណ៌ និងគ្មានក្លិន និងដែលបង្ក ជំងឺប្រសាទ គាំងបេះដូង ទឹកនោមផ្អែម មហារីក៘ ស្រូវ គឺជា រក្ខជាតិ ដែលប៉ិនពូកែបឺតស្រូបជាតិអារសឺនិក រហូតដល់១០ដង ច្រើនជាង ធុញ្ញជាតិផ្សេងទៀត ដូចជា ស្រូវសាឡី ពោត ជាដើម។ ជាតិអារសឺនិកនេះ ត្រូវបានផ្ទុកនៅក្នុងស្រទាប់អេពីឌែមច្រើនជាង នៅក្នុងអង់ដូស្ពែម (endosperme) បានន័យថា អង្ករសំរូប មានជាតិអារសឺនិក ច្រើនជាង អង្ករសម្រិត។